Amit sasargo sa quarterfinals

ASHGABAT, Turkme­nistan — Sinargo ni dating two-time world champion Rubilen Amit ang tiket sa quarterfinal round matapos talunin si Thi Ngoc Huyen ng Vietnam, 7-2 sa round of 16 women’s 10-Ball Pool singles sa 5th Asian Indoor and Martial Arts Games (AIMAG) kahapon dito sa Ashgabat Olympic Complex.

Hangad ni Amit, nag­reyna sa World 10-Ball Championship noong 2009 at 2013 na mapaganda ang kanyang kampanya sa quadrennial meet matapos mag-uwi ng bronze medal sa Incheon, South Korea noong 2013.

“Hopefully makakuha tayo ng medal. Kung ma-match ok, kung papalarin na mahigitan pa, mas maganda. I’ll do my best,” wika ni Amit.

Nakatakdang labanan ng 35-anyos na tubong Mandaue, Cebu si Iranian Parisa Mangli sa semifinal.

Samantala, natalo naman si women’s 9-Ball Singles silver medalist Chezka Centeno kay Chen Siming, 7-1 sa last 16.

Nakalasap naman ng kabiguan sina national bowlers Kenneth Chua at Jo-Mar Roland Jumapao sa India sa men’s quarterfinal doubles.

Tumapos si Chua, ang silver medal winner sa men’s singles, na may 224 points  habang nagtala si Jumapao ng 182 points para sa combined 406 points laban sa 418 nina Shabbir Dhankot (181) at Dhruv Sarda (237) ng India.

Sa women’s division, kakampanya naman sina Maria Liza del Rosario at Krizziah Lyn Tabora (Team 1) at Marian Lara Posadas at Marie Alexis Sy (Team 2) sa doubles event.

Sa Indoor Tennis, na­bigo sina Anna Patrimonio at Khim Iglupas kina Ankita Raina at Prarthana Thombare ng India sa quarters.