Ika-4 na sunod dinagit ng Eagles
Tinaasan na lang ng kamay ni Shan Gagate ng UE ang patirang si Vince Tolentino ng Ateneo sa UAAP. Miguel De Guzman
MANILA, Philippines — Napatahimik ng Ateneo ang University of the East, 83-65 upang mapatatag ang kapit sa solong pamumuno kahapon sa UAAP Season 80 men’s basketball tournament sa Mall of Asia Arena sa Pasay City.
Bidang-bida si Thirdy Ravena na humataw ng 21 puntos tampok ang 6-of-6 sa free throw line kasama ang walong rebounds, dalawang assists at isang steal para tulungan ang Blue Eagles na madagit ang ikaapat na sunod na panalo.
“(At this point,) we can’t be complacent with any team. Today, UE showed their fighting spirit. They gave us a hard time,” pahayag ni Ravena na may 58 percent shooting clip.
Nakatuwang ni Ravena si Matt Nieto na nagdagdag ng 11 puntos at tatlong assists habang naglista sina Aaron Black at Mike Nieto ng tig-10 puntos at pinagsamang 17 puntos sina Vince Tolentino at Anton Asistio.
“They are a tough team. We gave them 29 points in the third quarter. We’re happy with the way we played in the fourth quarter. We played well defensively and offensively but we couldn’t really say we had control of the game,” wika ni Blue Eagles assistant coach Sandy Arespacochaga.
Tuloy ang pangangapa ng Red Warriors na lumasap ng ikaapat na dikit na kabiguan para manatili sa ilalim ng standings.
Ito ay sa kabila ng pinagsikapang 22 puntos ni Alvin Pasaol at 19 markers nina Nick Abanto at Mark Maloles.
Humatak ang Blue Eagles ng kabuuang 44 rebounds, mas marami ng 12 boards sa naitala ng Red Warriors.
Sa ikalawang laro, nakaresbak ang Adamson University nang paamuhin nito ang National University, 83-76 upang umangat sa 2-2 rekord.
Nahulog ang Bulldogs sa parehong 2-2 card para samahan ang Adamson at Far Eastern University sa ikaapat na puwesto.
- Latest
