Centeno tutumbok sa ginto vs Chinese bet

ASHGABAT, Turkmenistan--Sinibak ni Chezka Centeno si Liu Shash, 7-3 ng China sa semifinals para sa tsansang masargo ang gintong medalya sa women’s 9-Ball Pool Singles sa 5th Asian Indoor and Martial Arts Games (AIMAG) dito sa Ashgabat Olympic Complex.

Makakatapat ng 18-an­yos na si Centeno sa finals si Chinese bet Han Yu.

Kasalukuyan pang ini­lalaro ang laban nina Centeno at Han habang isinusulat ito.

Pipilitin ng tubong Zamboanga City na maidagdag ang AIMAG title sa kanyang koleksyon matapos kunin ang ikalawang sunod na gold medal sa nakaraang 29th Southeast Asian Games sa Kuala Lumpur, Malaysia.

Nakuha ni Centeno ang anim sa una niyang walong lamesa laban sa 24-an­yos na si Liu sa kanilang Race-to-Seven encounter hanggang makasingit ang Chinese sa ninth game para sa 3-6 agwat.

Nang magkamali si Liu sa 10th rack ay tinapos na ni Centeno ang laro para umabante sa gold medal match.

Samantala, nabigo naman sina bowler Kenneth Chua at Muay Thai bet Philipp Delarmino sa finals ng kani-kanilang events para makuntento sa silver medals.

Humugot naman ang national team ng bronze medals mula kina Carlo Biado sa men’s 9-Ball Pool Singles at Al Rolan Llamas sa men’s -60kg sa Kurash.

Nakalasap si Biado ng 2-9 kabiguan kay Chang Jung Lin ng Taipei sa semifinals at nablangko si Llamas kay Turkmenistan bet Erkin Omurzakow, 0-10  sa Martial Arts Arena.

Kasalukuyang may dalawang gold medals ang Team Philippines mula kina Jiu Jitsu fighters Margarita “Meggie” Ochoa at Annie Ramirez at dalawang silver kina Rio Olympics ve­teran Hidilyn Diaz at Asian Champion Eric Cray.

Nag-ambag din ng silver medal sina Jiu Jitsu’s Gian Taylor Dee, Marc Alexander Lim at Jenna Kaila Napolis at may bronze medal sina Kristopher Robert Uy, Francis Aaron Agojo at Kristie Elaine Alora sa taekwondo, Alvin Lobreguito sa traditional wrestling at Jefferson Manatad sa belt wrestling.

Ang mga gold medal winners ay bibigyan ng cash incentives na P2 milyon.