Masolo ang unahan target ng La Salle vs UP
MANILA, Philippines — Tatargetin ng nagdedepensang La Salle ang solong liderato sa pakikipagtipan sa University of the Philippines ngayon sa pagpapatuloy ng UAAP Season 80 men’s basketball tournament sa Mall of Asia Arena sa Pasay City.
Nakatakda ang bakbakan ng Green Archers at Fighting Maroons sa alas-4:30 ng hapon ngunit masisilayan muna ang duwelo ng Far Eastern University at University of Santo Tomas sa alas-2.
Kasalukuyang magkasalo ang La Salle at Ateneo sa tuktok ng standings tangan ang parehong 3-0 baraha.
Mas lalong naging mapanganib ang Green Archers dahil dumating na sa bansa si reigning MVP Cameroonian Ben Mbala na galing sa kampanya sa FIBA Afrobasket.
Sa kanyang unang pagsalang, agad na nagpasiklab si Mbala na humataw ng career-high 32 points kasama pa ang 10 rebounds sa kanilang 85-73 panalo laban sa Adamson University noong Miyerkules.
“Playing in FIBA Afrobasket is a completely different level. Some of the players are NBA-level. I was able to learn a lot from them. I started working on the outside shot since preseason. Fortunate to have Afrobasket to play 3-4. I am used to it,” wika ni Mbala.
Masuwerte si La Salle mentor Aldin Ayo dahil malalim ang lineup nito.
Nariyan sina Ricci Rivero, Abu Tratter, Kib Montalbo, Jolo Go at Aljun Melecio para sumuporta sa kaniyang main man.
Haharap ang La Salle sa mapanganib na UP na galing sa 84-71 demolisyon sa University of the East.
Taglay ng Fighting Maroons ang 2-1 rekord.
Nauna nang hindi pinahintulutang makalaro si Ricafort ng UAAP eligibility committee dahil overage na umano ito.
Nakatakdang magdiwang ng ika-25 kaarawan si Ricafort sa Enero na siyang maximum age sa liga kaya’t overage na ito.
Subalit iginiit ng UP na pasok pa ito sa age limit dahil 24 pa lamang ito habang nilalaro ang basketball competition na matatapos sa Disyembre.
- Latest
