Resign Cojuangco!

Sigaw ng sports community

MANILA, Philippines — Sa araw na idineklara ni Pangulong Rodrigo Roa  Duterte ang  “A  Day of Pro­­test,  mahigit 100 sports officials at mga sports buffs ang dumalo sa isang rally kahapon para manawagan sa pagbibitiw ni Jose Cojuangco bilang president ng Philippine Olympic Committee.

Pinangunahan ng da­ting Philippine Sports Commission chairman Perry Mequi at dating Senador Nikki Coseteng ang mahigit tatlong oras na pro­testa sa loob ng makasaysayang Rizal Memorial Coliseum sa Malate, Manila.

“I’m calling all in the POC to resign from your respective positions and conduct an open and direct elections,” sabi ni dating UP professor Mequi.

Bukod sa main speaker na si Coseteng, dumating din sina Philippine Volleyball Federation president Gerald Cantada, Philippine Swimming League president Susan Papa, Gerry Malilin ng Philippine Bow­ling Congress at Johnny Romualdez ng Philippine Football Federation para  iprotesta ang nangyaya­ring pagkasira umano sa sports ng  bansa.

“We already know Cojuangco and his gang are corrupt, unfair and too senile to admit they are useless to remain in the POC. Now, we realize they are also deaf to the crews of the Filipino athletes. We have nothing to lose in this exercise, Mr. Cojuangco. But when you step down, Philippine sports has everything to gain,” ani Cantada.

Kahit si Marcia Cristobal ng Dragon Boat Federation at ang mga opisyales ng Federation of School Sports Association of the Philippines (FESSAP) ay nakikiisa sa panawagan sa pagbibitiw ng 83-anyos na si Cojuangco dahil sa mababang performance ng Team Philippines sa nakalipas na 29th Southeast Asian Games sa Kuala Lumpur, Malaysia kung saan nag-uwi lamang ng 24 gintong medalya ang bansa.

Mariing ipinahayag ni Coseteng ang kanyang pagkadismaya sa patuloy na suporta ng POC sa fugitive na presidente ng Philippine Swimming Inc. (PSI), na mayroong nakabinbin na warrant of arrest mula sa Sandiganbayan noon pang nakaraang taon.

“POC must remove now Mark Joseph. Why is Cojuangco is not removing him. We can’t be part of an entity that is so rotten,” ayon naman kay Coseteng na siya ring chairman ng Phi­lippine Swimming League.

Ang panawagan sa pagbitiw ni 12-year POC president Cojuangco ay isang nation-wide  kilos protesta dahil kasabay nito ang pagdaraos sa parehong rally sa Cebu City sa Fuente Osmeña at sa Davao City.