UAAP: Lady Bulldogs diretso sa 51
MANILA, Philippines — Namamayagpag pa rin ang reigning champion National University na pinalawig ang kanilang winning streak sa 51 matapos ilampaso ang University of Santo Tomas sa pamamagitan ng 95-65 demolisyon kahapon sa UAAP Season 80 women’s basketball tournament sa Mall of Asia Arena sa Pasay City.
Nagpasabog ang Lady Bulldogs ng 54-27 atake sa second half laban sa Tigresses para mapatatag ng NU ang kanilang kapit sa solong liderato hawak ang malinis na 3-0 rekord.
Nangibabaw si Trixie Antiquera para sa Lady Bulldogs na humakot ng 27 puntos habang kumana naman si Jack Daniel Anmam ng double-double na 23 points at 18 rebounds.
Halos magtala naman si Ria Nabalan ng triple-double na 17 points, 11 boards at siyam na assists para sa NU.
Kumana rin si Rhena Itesi ng sariling double-double na 13 points, 10 boards at dalawang blocks sa hanay ng Lady Bulldogs.
Bagsak ang UST sa four-way tie sa No. 2 spot kasama ang Far Eastern University, University of the East at Ateneo de Manila University na may magkakatulad na 2-1 kartada.
Sumampa naman ang Adamson University sa winners’ column nang payukuin nito ang La Salle sa iskor na 88-84 sa likod ni Nathalia Prado na may 26 points.
Lumasap ang Lady Archers ng ikatlong sunod na kabiguan para mabaon sa ilalim ng standings.
- Latest