Diaz, Cray nakuntento sa silver
ASHGABAT, Turkmenistan — Ang mga inaasahang sina 2016 Rio Olympics silver medalist Hidilyn Diaz at Fil-American Eric Cray ay nabigong makamit ang inaasam na gold medal sa 5th Asian Indoor and Martial Arts Games (AIMAG) kamakalawa ng gabi rito sa Ashgabat Olympic Complex.
Nagkasya lamang si Diaz sa silver medal matapos magtala ng kabuuang 204 points para pumangalawa kay Liao Qiuyun (208) ng China sa pinagsamang pagbuhat sa snatch at clean and jerk sa 53kg category.
Si Turkmenistan bet Kristina Skermetova (196) ang kumuha sa bronze.
“Kaya ko pa pala,” sabi ng 26-anyos na Pinay weightlifter. “Sabi ko nga ayoko na, gusto ko na mag-give up kasi nahirapan ako mag-disiplina. Pero hindi rin ako nag-give up… Kaya ko pala, napatunayan ko na kaya ko pa, wala sa age.”
“Hindi dahil nanalo ka na hindi ka na pwedeng bumalik pa, puwede pa pala,” dagdag pa ng tubong Zamboanga City.
Pumangalawa naman si Cray sa 60m run sa kanyang isinumiteng 6.63 segundo sa ilalim ng 6.55 segundo ni reigning champion Hassan Taftian ng Iran kasunod si Iranian Reza Ghasemi (6.64).
Tumapos si long jumper Janry Ubas sa ikaapat sa kanyang nilundag na 7.40-meters sa ilalim nina gold medalist Nguyen Tien Trong ng Vietnam (7.48m), Amila Pedige ng India (7.45m) at Chan Ming Tai ng Hong Kong (7.44m).
Sa taekwondo, nakuntento sina Kirstie Elaine Alora at Kristopher Robert Uy sa bronze medal matapos yumuko kina Svetlana Osipova (8-16) ng Uzbekistan at Liu Jintao (10-27) ng China, ayon sa pagkakasunod, sa semifinals.
- Latest