Pinoy athletes nabokya sa gold
KUALA LUMPUR – Nabokya ang Team Philippines sa gold medal race kahapon matapos makasungkit ng isang silver at apat na bronze medals sa ikalimang araw ng kumpetisyon sa 29th Southeast Asian Games sa Bukit Jalil National Stadium dito.
Tanging si Kaitlin de Guzman ang nakakuha ng silver medal mula sa floor exercise ng artistic gymnastics at sinundan pa ng 17-anyos na US-based ng isang bronze sa balance beam event.
Nakakuha rin ng tansong medalya sina Reyland Capellan sa vault event ng artistic gymnastics at Arniel Ferrera sa hammer throw ng athletics event (55.94-m).
Ang isang bronze medal ay mula kay Mae Soriano pagkaraang manalo kay April Phaw ng Myanmar sa bronze medal match ng women’s karatedo -55kg kumite.
Patuloy pa rin ang laban ng Team Philippines sa araw na ito kung saan mahigit 48 gintong medalya ang nakataya at inaasahang babawi ang mga atletang Pinoy sa athletics, billiards, bowling, swimming, gymnastics, karatedo, pencak silat, cycling at shooting.
Buhay pa rin ang asam ng Philippine swimming team na matapos ang mahabang gold medal drought sa pamamagitan ni 2016 Rio Olympian Jasmine Alkhaldi.
Pumasok ang 23-anyos na si Alkhaldi sa finals ng women’s 100-m freestyle ngayong gabi.
Ang star-studded billiards team nina Carlo Biado, Warren Kiamco, Rubilen Amit at Cheska Centeno ay inaasahang magbibigay ng malaking panalo.
Sa athletics, babawi sina Mark Harry Diones sa men’s triple jump at sina Mervin Guarte at Marco Vilog sa men’s 800-meter run.
Sa men’s basketball, dinurog ng Gilas cadets ang Malaysia, 98-66, para walisin ang eliminasyon.
Kumolekta si Fil-German Christian Standhardinger ng 18 points at 18 rebounds para sa 3-0 record ng Gilas cadets sa Group A.
Tuluyan namang naglaho ang pag-asa ng men’s at women’s football teams matapos matalo sa defending champion Thailand, 0-2.
Ito na ang kanilang ikatlong sunod na pagkatalo ng national men’s team (1-3) sa Group B.
Nabigo naman ang Malditas sa Myanmar, 0-6, para sa 1-2 record.
Makakaharap ng Malditas ang Thailand ngayong alas-4 ng hapon.
- Latest