Rematch nina Pacquiao at Horn sa Brisbane
MANILA, Philippines - Matapos ang ilang agam-agam ay nasementuhan na ang rematch nina Filipino world eight-division champion Manny Pacquiao at world welterweight king Jeff Horn sa Brisbane, Australia sa Nobyembre.
Inihayag kahapon ni Brisbane Lord Mayor Graham Quirk ang pagpayag ni Pacquiao na muling sagupain si Horn, ang bagong World Boxing Organization welterweight titlist.
“I have had a meeting earlier today which has confirmed that Manny Pacquiao will definitely be in Brisbane this year for a rematch with Jeff Horn,” sabi ni Quirk sa report ng Sydney Morning Herald.
Nauna nang ninerbiyos si Quirk na hindi matutuloy ang rematch nina Horn at Pacquiao dahil wala pang kumpirmasyon ang Senador.
“It was a matter of Manny Pacquiao deciding whether he wanted to take up that clause in the contract to give a rematch in the event that he lost,” wika ni Quirk.
Tinalo ng Brisbane para sa hosting rights ng Pacquiao-Horn II ang Sydney at Melbourne.
Binigo ni Horn si Pacquiao via unanimous decision para agawin sa Filipino boxing icon ang hawak nitong WBO welterweight crown noong Hulyo 2 sa 55,000-seater na Suncorp Stadium sa Brisbane.
May nakasaad sa rematch clause sa nilagdaang fight contract nina Pacquiao at Horn kung saan ang kanilang ikalawang laban ay maaari lamang gawin sa Australia.
“The details around a renewed contract will have to be worked through but given what I have not been advised today through Duco and Top Rank, we are in a position now where Brisbane Marketing will be re-engaged to get involved in the negotiation plan,” wika ni Quirk.
Muling gagawin ang laban sa Suncorp Stadium.
- Latest