Team Phl nagdagdag ng limang ginto

Mula sa gymnastics, fencing, athletics at Wushu

KUALA LUMPUR – Da­­lawang gymnasts, isang wu­shu artist at dalawang Fil-Am fen­cer at trackster ang nagbigay sa Pi­lipinas ng limang gintong me­dalya sa 29th Southeast Asian Games kahapon dito.

Nagpakitang-gilas sina veteran Reyland Capellan at bagitong si Kaitlin de Guz­­man para angkinin ang gold medal sa kanilang mga events sa gymnastics competition sa Malaysia In­ternational Trade and Exhibition Center.

Kumubra ang 23-anyos na si Capellan, ang gold me­dalist noong 2015 SEA Games sa Singapore, ng 13.950 points para pagha­rian ang men’s floor exercise event.

Tinalo ni Capellan para sa gintong medalya sina Zul Bahrin Bin Mat Asri ng Malaysia at Tikumporn Su­rintornta ng Thailand na nagtala ng 13.750 at 13.670 points, ayon sa pag­kakasunod.

“I’m so happy that I am able to contribute to the gold-medal production of the Philippines,” wika ni Ca­pel­lan, dating miyembro ng Centro Escolar University pep squad na lumahok sa World Artistic Gymnastics sa Glasgow noong 2015.

Matapos ang isang oras ay isinunod naman ni De Guzman ang kanyang gold medal nang ku­molekta ng 12.875 points sa pagrereyna sa uneven bars category.

Tinapos ng 17-anyos na si De Guzman ang 20-year old gold-medal drought ng bansa sa women’s artistic gymnastics event.

Dinaig ni De Guzman si­na Tracie Ang ng Malaysia (12.550 points) at Rifda Irfanaluthfi ng Indonesia (12.075 points).

“I am so happy now that I won a gold medal repre­sen­ting the Philippines,” ani De Guzman, isang senior sa Epic Charter Home School sa Dallas, Texas at anak ni Cintamoni Dela Cruz, nagwagi sa nasabing event noong 1995 SEA Games sa Chiang Mai, Thailand.

Humugot din ang ban­sa ng gold medal mula kina Fil-Am trackster Eric Cray, wushu artist Agatha Wong at Fil-Am fencer Brennan Wayne Louie.

Nagsumite si Cray ng bilis na 50.03 segundo para pagharian ang men’s 400m hurdles.

Umiskor naman si Wong ng 9.66 points para pa­mahala­an ang women’s taijiquan event.

Dinaig ni Louie, ang gold medalist sa Asean Cham­pionship, ang kababayang si Natha­niel Perez sa men’s foil event sa fencing compe­tition.