Cray target ang gold sa athletics
MANILA, Philippines - Puntirya ni Filipino-American Eric Shauwn Cray na masungkit ang dalawang gintong medalya sa athletics competition ng 2017 Southeast Asian Games sa Bukit Jalil National Stadium sa Kuala Lumpur, Malaysia.
Ipagtatanggol ng two-time Olympian ang kanyang korona sa men’s 100m dash at 400m hurdles sa pag-asang madugtungan ang gold-medal finish ni Mary Joy Tabal sa women’s marathon.
Lalarga ang Asian Championship gold medal winner sa preliminary round ng 100m dash sa alas-3:30 kasama si three-time NCAA sprint champion Anfernee Lopena.
Aariba rin ang 28-anyos na si Cray sa men’s 400-meter hurdle heats.
Kung makakapasok sa finals ay muling lalarga si Cray sa men’s 400m sa alas-8:20 ng gabi at sa 100m dash makalipas ang isang oras at 20 minuto.
Magtatangka ring humirit ng ginto si Fil-Am Zion Rose Nelson sa women’s 100-meter preliminaries sa alas-3:10.
Si Nelson ang pumalit kay defending champion Kayla Richardson sa event.
Tatakbo Richardson sa women’s 200m race bukas at sa 4x100 at 4x400-meter relays.
Lalarga rin si Aries Toledo sa men’s decathlon at sina Singapore SEA Games bronze medalist Rosie Villarito at Evalyn Palabrica sa women’s javelin throw.
Target ng Pinoy tracksters na malampasan ang 5 ginto, 7 pilak at 9 tansong nakamit noong 2015 SEA Games.
- Latest