1st gold ng Pinas itinakbo ni Tabal
Kuala Lumpur - Mataas ang pag-asa ng mahigit 731-man Team Philippines habang iwinawagayway ang bandila ng bansa sa isinagawang parada sa opening ceremonies na simbolo sa pornal na pagbubukas ng 29th Southeast Asian Games sa Bukit Jalil National Stadium dito.
Inaasahan ng mahigit 498 atleta, 163 coaches at 70 opisyales ng Philippine delegation na malampasan ang sixth place finish sa nakaraang 2015 edisyon sa Singapore.
Sa pangunguna ni Chief of Mission Cynthia Carrion, Philippine Olympic Committee president Jose Cojuangco at Philippine Sports Commissioners Ramon Fernandez at PSC executive-director Atty. Carlo Abarquez hangad ng bawat isa ang matagumpay na kampanya.
Umani na ng kabuuang isang gintong medalya mula kay Mary Joy Tabal sa marathon, isang pilak mula sa chinclone team event ng sepak takraw at dalawang tanso mula sa archer ang Pinoy team at inaasahang umangat sa itaas ng standing sa pag-usad ng 12-day kumpetisyon sa mga darating na araw.
May halo ring lungkot ang kampanya matapos magkaroon ng injury ang dalawang pambato sa athletics na sina Europian-trained Ernest John Obiena (ACL) at Patrick John Unso (hamstring).
Kahit si Philippine Amateur Track and Field Association (Patafa) president Philip Ella Juico na mismo ang umaming malaking kawalan sa kampanya ang masaklap na pangyayari kung saan target sanang malampasan ang limang gintong produksiyon ng athletics sa 2015 Singapore Games.
“We win some, we lose some; that’s the way of life. We are all saddened by the bad news, but we have to live with it. It’s just that the kid (Obiena) really wanted to win and is so determined to bring honor to the country,” sabi ni Juico.
Handa namang harapin ni Filipino-American Eric Shawn Cray na i-depensa ang titulo sa men’s 100-meter at 400-meter hurdles sa Martes.
Si Cray ang kasalukuyang record holder sa SEA Games sa century dash kaya siya rin ang mahigpit na binabantayan ng mga kalaban.
“I’ll go for both. I’m gonna hold and go out there to win the gold,” sabi ni Cray.
Malakas naman ang tiwala ni dating four-time World Cup champion at ngayon head coach Paeng Nepomuceno sa magandang kampanya ng bowling team sa pamamagitan nina dating Asian bowling champion Liza del Rosario, Krizziah Lyn Tabora, Dyan Arcel Coronacion, Lara Posadas at Marie Alexis Sy sa women’s singles alas-9 ng umaga ngayon.
Sa men’s singles sisimulan na rin nina John Paule Macatula, Jo-Mar Roland Jumapao, Kevin Oliver Cu at Mervin Tan ang asam na gintong medalya alas-2:30 ng hapon sa Sunway Pyramid sa Petaling Jaya.
“This team is promising because they trained hard and well,” sabi ni PBF founding member at multi-titled bowler Bong Coo.
- Latest