Bolts sinunog ang Fuel Masters
MANILA, Philippines - Nalampasan ng Meralco ang matinding paghahabol ng Phoenix sa fourth quarter at ang magandang inilaro ng bagong hugot na si Jeff Chan para makaiwas sa kanilang ikalawang sunod na kamalasan.
Humakot si 2016 PBA Best Import Allen Durham ng 33 points at 16 rebounds para tulungan ang Bolts na matakasan ang Fuel Masters, 107-104 sa 2017 PBA Governor’s Cup kahapon sa Smart Araneta Coliseum.
Nagdagdag naman si shooting guard Garvo Lanete ng 27 markers tampok ang 6-of-14 shooting sa three-point range para sa pang-limang panalo ng Meralco matapos ang 94-100 kabiguan sa NLEX noong Agosto 13.
Tumipa sina 2016 Rookie of the Year Chris Newsome at Reynel Hugnatan ng 18 at 15 points, ayon sa pagkakasunod, para sa Bolts.
Nalasap naman ng Phoenix ang kanilang ikaapat na sunod na kabiguan sa anim na laro matapos ang 2-0 panimula sa season-ending conference.
Nasayang ang kinamadang 38 points ni import Brandon Brown, pansamantalang pumalit kay Eugene Phelps, may iniindang foot injury, at 27 markers ni Chan.
Nahugot ng Fuel Masters ang 33-anyos na si Chan mula sa Rain or Shine Elasto Painters sa pamamagitan ng isang trade sangkot si Mark Borboran at isang future second round draft pick.
Ipinoste ng Meralco ang 15-point lead, 77-62, sa huling apat na minuto ng third period hanggang makatabla ang Phoenix sa 99-99 galing sa undergoal stab ni Chan sa huling 2:45 ng laro.
- Latest