Unang medalya ng Pinas
MANILA, Philippines - Nasungkit ng national sepak takraw team ang unang medalya ng Pilipinas matapos kubrahin ang pilak sa men’s chin lone event 3 ng 2017 Southeast Asian Games kahapon sa Stadium Titiwangsa sa Kuala Lumpur, Malaysia.
Nakalikom ang Pinoy squad ng 271 puntos para pumangalawa laban sa host Malaysia na nagtala ng 391 puntos na siyang umani ng gintong medalya.
Binubuo ang koponan nina John-John Bobier, Rhemwil Catana, Emmanuel Escote, Ronsited Gabayeron, Joeart Jumawan, John Carlo Lee, John Jeffrey Morcillos, Regie Pabriga at Alvin Pangan.
“Chin lone is a subjective sport so it’s really difficult to beat the host country,” wika ni Philippine Amateur Sepak Takraw Association president Karen Tanchanco-Caballero.
Umusad sa finals ang Pilipinas nang payukuin ang Brunei Darussalam sa pamamagitan ng 293-157 desisyon.
Umaasa si Tanchanco-Caballero na magpapatuloy ang magandang ratsada ng kanyang bataan kung saan pakay ng tropa na makasungkit ng dalawang gintong medalya sa regu events.
Sa archery, humirit ng tansong medalya si Paul Dela Cruz sa men’s individual archery compound event na ginanap sa Synthetic Turf Field sa KL Sports City sa Bukit Jalil.
Tinalo ni Dela Cruz si 2015 Singapore SEA Games silver medalist Zulfadhli Ruslan ng Malaysia, 10-9, sa sudden-death shoot-off para makuha ang tanso.
Matapos ang 50 arrows, tabla ang iskor nina Dela Cruz at Ruslan sa 144 dahilan upang mauwi sa hoot-off ang laban.
Desidido naman ang national boxing team na makapag-ambag ng gintong medalya sa kampanya ng pambansang koponan.
Magsisimula sa Linggo ang boxing competition sa Mitec Hall 8 kung saan mangunguna sa kampanya ng bansa sina Charlie Suarez at Mario Fernandez.
“Gusto po namin ipakita ngayon na gutom na gutom pa rin kami sa mga gintong medalya,” wika ni Suarez na lalahok sa light welterweight class.
- Latest
