Hosting ng 2019 Manila SEAG tuloy?
MANILA, Philippines - Tuloy ang pagho-host ng 30th Southeast Asian Games dito sa Pilipinas sa darating na 2019.
Nabuhay muli ang interes sa hosting ng 2019 SEA Games matapos mag-usap sina Presidential Management Staff Sec. Lawrence ‘Bong’ Go at Foreign Affairs Secretary Alan Peter Cayetano tungkol sa hosting ng bansa sa nasabing biennial meet.
Ipinaliwanag ni Philippine Sports Commission (PSC) chairman William “Butch” Ramirez sa pagtitipon ng mga malalakas na gabinete ni Pangulong Rodrigo Duterte sa Malacañang kamakailan nang tinanong siya nina Sec. Cayetano at Sec. Go kung susuportahan ba niya ang hosting ng bansa sa 2019 SEA Games.
“Ang sagot ko ay yes. Pero, sina Sec. Cayetano at Sec. Bong Go na ang gagawa ng final announcement,” sabi ni Ramirez.
Sa balak na ituloy ang SEAG dito, sina Cayetano at Bong Go na mismo ang makikipag-usap kay Philippine Olympic Committee president Jose Cojuangco at sila na rin ang gagawa ng final announcement, ayon pa kay Ramirez.
Sinabi pa ni Ramirez na kahit si Sen. Juan Miguel Zubiri ay sumang-ayon din na ituloy ang 2019 SEAG dito sa Pilipinas.
Sa isinagawang PSC Board Meeting kahapon, lahat ng mga commissioners na sina Ramon Fernandez, Celia Kiram, Charles Maxey at Arnold Agustin ay sang-ayon din sila na ituloy ang hosting ng SEAG sa bansa.
Kasama umano sa meeting sa Malacañang sina Cabinet Sec. Leoncio Ebasco, Transportation Secretary Arthur Tugade, DPWH Sec. Mark Villar, Sec. Bong Go at Sec. Cayetano.
Sinabi naman ng isang insider sa Malacañang na ang pakikipagpulong ni Cayetano at Go kay Cojuangco ay may basbas ni Pangulong Rodrigo Duterte.
- Latest
