Pirates tutusukin ang ikaapat na panalo
MANILA, Philippines - Ikaapat na panalo na magpapatatag sa kanila sa liderato ang puntirya ng Lyceum of the Philippines sa pakikipagtuos nila sa Arellano University sa NCAA Season 93 men’s basketball tournament sa The Arena sa San Juan City.
Magpapang-abot ang Pirates at Chiefs ngayong alas-2 matapos ang bakbakan ng Mapua University at Emilio Aguinaldo College sa alas-12 ng tanghali.
Lalarga rin ang salpukan ng nagdedepensang San Beda College at Colegio de San Juan de Letran sa alas-4 ng hapon.
Natuhog ng Pirates ang ikatlong sunod na panalo matapos patumbahin ang San Sebastian Stags, 78-73, noong Biyernes.
Malakas na puwersa ang nanggaling kay CJ Perez na siyang nagtala ng 20 puntos, habang nagdagdag naman si team captain Jesper Ayaay ng 17 puntos para mapanatili ng Intramuros-based squad ang malinis na rekord.
Napasama ang Stags sa mga paboritong koponan na isa-isang pinabagsak ng Pirates kabilang ang Jose Rizal University Heavy Bombers, 96-75, at ang Red Lions, 96-91.
Magugunitang ang San Beda, Jose Rizal at San Sebastian ang Top 4 teams sa Filoil Premier Cup noong nakaraang buwan.
Subalit wala sa isip ni Lyceum coach Topex Robinson ang maging kampante.
“You can’t win the championship in just three games. We have to keep working harder and stay hungry to sustain this winning,” ani Robinson.
Kaya naman inaasahang buhos lakas pa rin ang Pirates lalo pa’t isa ring contender ang Chiefs na finalist noong nakaraang taon.
Hawak ng Arellano ang 2-1 rekord.
Galing ito sa 73-72 panalo laban sa Jose Rizal sa likod ng game-winning basket in Kent Salado.
Kumulekta si Salado ng kabuuang 25 puntos, anim na rebounds, walong assists at dalawang steals kaya’t markado ang pangalang ito sa Pirates.
“This is his team now and he is proving that he is capable of carrying this team,” sambit ni Arellano mentor Jerry Codiñera.
Umaasa naman ang San Beda na magtutuluy-tuloy ang kanilang ratsada matapos lumasap ng kabiguan sa Lyceum.
Tinalo ng Red Lions ang College of Saint Benilde, 76-52, at Emilio Aguinaldo College, 81-69, para makabalik sa porma tangan ang 3-1 kartada.
Haharapin ng San Beda ang Letran na buhat sa 62-65 kabiguan sa Jose Rizal noong Biyernes.
- Latest