Otico abante sa quarters

MANILA, Philippines - Hindi matinag si top seed John Bryan Decasa Otico na bukod-tanging Pinoy netter na umabante sa quarterfinals ng 2017 International Tennis Federation (ITF) Junior Championships Week 2 boys’ singles na ginaganap sa National Tennis Development Center sa Nonthaburi, Thailand.

Hindi hinayaan ni Otico na makaporma ang kanyang Thai rival na si Michael Mathayomchand matapos ipatikim ang 6-4 6-4 panalo na siyang nagdala sa kanya sa susunod na yugto ng naturang Grade 4 tournament.

Makakasagupa ni Otico sa quarterfinals si seventh pick Akanit Pumjit ng Thailand na nailusot ang 7-6 (4), 4-6, 6-0 panalo laban kay 10th seed Sacchitt Sharrma ng India sa kanilang sariling third-round match.

Kabisado na ni Otico ang laro ni Pumjit na siya ring tinalo nito sa semifinals ng International Tennis Federation (ITF) Junior Championships Week 1 noong nakaraang linggo sa bendisyon ng 6-4, 6-4 panalo.

Muling minalas si third seed Arthur Craig Pantino nang lumasap ito ng 1-6, 0-6 demolisyon laban kay unheralded player Keisuke Saitoh ng Japan sa third round.

Nakabawi naman sina Pantino at Otico sa doubles kung saan pinataob ng top-seeded pair sina Kun Liu ng Chinese-Taipei at Sumitpal Singh ng India sa second round sa iskor na 6-0, 3-6, 10-4.