Cignal masusubok sa Wangs Basketball
MANILA, Philippines - Sapat ang siyam na araw na pahinga upang makaipon ng lakas ang Cignal HD bago muling sumabak ngayong hapon sa 2017 PBA D-League Foundation Cup sa Ynares Sports Arena sa Pasig City.
Makakatipan ng Cignal ang Wangs basketball sa alas-3.
Hawak ng Hawkeyes ang 5-2 baraha at masaya si coach Boyet Fernandez sa ipinakita ng kanyang tropa sa naturang seven-game swing.
Subalit wala sa plano ni Fernandez na maging kumpiyansa dahil marami pang dapat ayusin sa kanilang sistema.
“May mga mali pa rin, but we just have to be consistent and not be complacent in our coming games,” wika ni Fernandez.
Malaking butas ang naiwan sa Cignal sa pagkawala ni Davon Potts na naghahanda na kasama ang San Beda sa pagdepensa ng titulo sa NCAA Season 93 men’s basketball tournament na magsisimula sa Hulyo 8.
Kaya naman maiiwan ang pasanin kina Raymar Jose at Jason Perkins na pareho namang beterano ng mga krusyal na bakbakan.
Haharap ang Hawkeyes sa Wangs Basketball na galing sa dalawang sunod na panalo para umangat sa 3-2 rekord.
Nakatakda naman ang pukpukan ng AMA Online Education (0-4) at Centro Escolar University (2-2) sa alas-5.
- Latest