Respetadong pagtatapos
Laro Ngayon (Baliwag Star Arena)
5 pm Cherrylume vs Cocolife
7 pm Generika-Ayala vs Cignal
MANILA, Philippines - Asahan ang matinding bakbakan sa pagitan ng Cignal at Generika-Ayala na naghahangad na magarbong tapusin ang group stage ng Philippine Superliga (PSL) All-Filipino Conference ngayong araw sa Baliwag Star Arena sa Bulacan.
Nakatakda ang pukpukan ng HD Spikers at Lifesavers sa alas-7 ng gabi habang aarangkada rin ang duwelo ng Cherrylume at Cocolife sa alas-5 ng hapon.
Galing ang HD Spikers sa panalo laban sa Petron kaya’t bahagyang mataas ang kumpiyansa nito bago harapin ang Lifesavers.
Kasalukuyang nasa ikalawang puwesto ang Cignal tangan ang 4-1 marka sa Pool C habang nasa unahan ang two-time Grand Prix champion Foton na may 5-1 baraha.
Nasa No. 3 ang Petron (4-2) at No. 4 ang Generika-Ayala (2-3).
Sa Pool D, hawak ng nagdedepensang F2 Logistics ang 4-2 kartada kasunod ang Sta. Lucia (2-4), Cocolife (1-4) at Cherrylume (0-5).
Anuman ang maging resulta ng laro ngayon, ito na ang magsisilbing final ranking bago pumasok sa quarterfinals.
Makakaharap ng Foton sa knockout stage ang Cherrylume habang titipanin ng Cignal ang Cocolife.
Ang iba pang quarterfinal pairings ay ang Petron laban sa Sta. Lucia at Generika-Ayala laban sa F2 Logistics.
- Latest