Ahomiro makakalaro na sa Perlas Spikers

MANILA, Philippines - Binigyan ng go-signal na makalaro si Amy Ahomiro para sa Perlas Spikers sa nakatakdang pagbubukas ng Premier Volleyball League Open Conference sa Sabado sa The Arena sa San Juan City.

Ito ay matapos amyendahan ng PVL ang patakaran nito na pinahihintulutang makalaro ang foreign players na residente ng Pilipinas sa loob ng 10 taon at nagtataglay ng Alien Certificate of Residence (ACR).

Dito nag-aral ng high school si Ahomiro sa Brent School bago magtungo sa Ateneo de Manila University kung saan naging bahagi ito ng Lady Eagles na nakahirit ng dalawang korona sa UAAP.

“Our next conference is an Open Conference, not  All-Filipino. This is so because we will allow foreign nationals who are residents of the Phl and holders of an ACR to play in our league,” pahayag ni Ricky Palou na pangulo ng organizing Sports Vision.

Subalit hindi makakalaro ang isa pang player na si Thai Patcharee Saengmuang na nauna nang napaulat na naka-lineup sa Power Smashers.

Si Saengmuang na dating team captain ng Thailand national team ay tatlong taon pa lamang naninirahan sa Pilipinas.

“However, we have put a restriction as only foreign residents and ACR holders for 10 continuous years will be allowed to play in Open Conference,” ani Palou.

Ikinatuwa naman si Charo Soriano na isa sa mga Perlas managers at co-founder ng Beach Volleyball Republic, ang magandang balita.

Makakasama ni Ahomiro sina dating University of the Philippines standouts Katherine Bersola at Nicole Tiamzon, Ateneo libero Gizelle Tan, Ella de Jesus, Jam Ferrer, Suzanne Roces, Mae Tajima at Ryssabel Devanadera.

Wala naman si open hitter Dzi Gervacio na nag-aaral sa Amerika.

Unang makakaharap ng Perlas ang Philippine Air Force sa opening day sa alas-6:30 ng gabi habang magpapang-abot naman ang Creamline at Adamson-Akari sa alas-4.

Kasali rin ang Hapee Toothpaste, BaliPure, Power Smashers at nagdedepensang Pocari Sweat.