3 Pinoy boxers susuntok sa semis

MANILA, Philippines - Tatlo pang miyembro ng national boxing team ang nakasungkit ng tiket sa semifinals matapos payukuin ang kani-kanilang karibal sa 2017 Ulaanbaatar Cup Boxing Tournament na ginaganap sa Ulaanbaatar, Mongolia.

Nagtala ng magka­ka­ibang panalo sina reigning Southeast Asian Games champion Eumir Felix Marcial (men’s middleweight), Incheon Asian Games silver medalist Charly Suarez (men’s light welterweight) at Rio Olympics veteran Rogen Ladon (men’s light flyweight) sa kani-kaniyang quarterfinal matches.

Unang umariba si Ladon nang kubrahin nito ang 5-0 unanimous decision win laban kay Mongolian Munkh-Erdene Damdindorj kung saan nagtala ang Pinoy pug ng 30-27, 30-27, 30-27, 30-27, 29-28 iskor mula sa limang hurado.

Hataw din si Suarez na umani ng 4-0 panalo laban kay Norovbal Otgontumur ng Mongolia.

Ibinigay ng apat na jud­ges ang 30-24, 29-27, 30-25 at  28-27 para kay Sua­rez habang ang ikalimang hurado na si Tsai Jun-Shun ng Chinese-Taipei ay nagtala ng 28-28 draw.

Dumaan naman sa butas ng karayom si Marcial bago takasan ang Chinese na si Hu Richa Bilige, 3-2.

Pumabor kay Marcial sina Firas Suhael Naser ng Iraq (30-27), Mohammed Nashwan ng Jordan (30-27) at Tserenkhand Tsogtgerel ng Mongolia (29-28) habang nakuha ng Chinese bet ang boto nina Kuanysh Kauashov ng Kazakhstan at Zhamila Borkoeva ng Kyrgyzstan na parehong may iginawad na 29-28 iskor.

Sunod na haharapin ni Ladon si Shyam Kumar Kakara ng India na nanalo kay Enkhmandakh ng Mongolia (5-0) habang sasagupain ni Suarez si Bayarkhuu Ganbaatar ng Mongolia na nanaig naman kay Na Mei La ng China (3-2).

Lalarga naman si Marcial kontra kay Zhan Chao Feng ng China na namayani kay Erkhembayar Batbayar ng Mongolia (3-2).

Makakasama nina Ladon, Suarez at Marcial sa semis si Riza Pasuit sa women’s lightweight.

Bigo naman si Judelyn Casin na lumasap ng 1-4 desisyon kay Altantsetseg Lutsaikhan ng Mongolia sa kanilang quarterfinal match sa women’s fly.