Mahigit 600 delegasyon sa SEAG isusumite na sa PSC
MANILA, Philippines - Pagkatapos ng itinakdang deadline para sa 37 national sports associations upang magsumite ng kanilang iba’t ibang line-ups, umabot sa mahigit 487 atleta at 168 coaches ang kasama sa Philippine contingent sa 29th Southeast Asian Games na gaganapin sa Agosto 19-30 sa Kuala Lumpur, Malaysia.
Ayon kay POC-PSC SEA Games Joint Task Force chairman Tom Carrasco, hindi pa kasama ang inaasahan ding 70 miyembro ng medical at secretariat team na sila ang mag-aasikaso sa mga atleta.
Idinagdag pa ni Carrasco na kailangan pa ang approval ng Philippine Sports Commission dahil sila ang magpopondo sa partisipasyon ng bansa at gagastos sa air-fair, hotel at pagkain ng lahat na miyembro ng buong delegasyon. Matapos aprubahan ng PSC, ito ay dadaan naman sa Philippine Olympic Committee executive board para sa final approval.
Ang athletics ang may pinakamaraming ipinadala sa 38 at tig-20 naman ang lawn bowls at ice hockey habang tig-12 sa men’s at women’s basketball, tig-20 naman sa under-23 boys at women’s football at 29 sa aquatics kabilang na ang 8 sa swimming, 13 sa water polo, 4 sa open swimming at 4 sa synchronized swimming.
Mauunang umalis ang netball, football at secretariat sa Agosto 12 dahil kaagad magsisimula ang kanilang events, dagdag ni Carrasco.
- Latest
