NCAA on Tour tuloy na
MANILA, Philippines - Tuluy na tuloy na ang pagdayo ng National Collegiate Athletic Association basketball tournament sa iba’t ibang paaralan sa pagbubukas ng Season 93 sa Hulyo.
Unang makakatikim ng school games ang Arellano University gymnasium sa Legarda, Manila tampok ang bakbakan ng Season 93 host San Sebastian College at Arellano sa seniors division sa Hulyo 13.
Ayon kay NCAA Management Committee chairman Fr. Glyn Ortega, OAR, ng San Sebastian, ang NCAA on Tour ay idaraos tuwing Huwebes.
Sunod na idaraos ang laro sa Mapua Institute of Technology Gym sa Hulyo 20, San Sebastian-Cavite sa Hulyo 27, Colegio de San Juan de Letran Gym sa Agosto 3, Emilio Aguinaldo College Gym sa Agosto 10 at University of Perpetual Help System Dalta Gym sa Agosto 17.
Mayroon ding junior games sa Letran Gym sa Hulyo 9 kung saan maghaharap ang last year’s runner-up San Beda sa ala-una at ang defending champion Mapua at Arellano sa alas-3.
Nakatakda ang opening ceremony ng liga sa Hulyo 8 sa Mall of Asia Arena sa Pasay City.
Lalarga ang bakbakan ng reigning seniors titlist San Beda College at San Sebastian sa alas-2 na susundan ng duwelo ng Mapua at Arellano sa alas-4.
May tatlong seniors games tuwing Martes at Biyernes na karamihan sa mga laro ay gaganapin sa The Arena sa San Juan City.
“The idea is to reignite the student’s passion for the NCAA by bringing the games straight to them. Also, it will be part of our celebration of our 100th year anniversary a few years from now,” ani Ortega.
Plano rin ng liga na itanghal sa edisyong ito ang 3x3 basketball at futsal sa second semester.
- Latest