7 Pinoy boxers pasok sa quarters

Mongolia boxingfest

MANILA, Philippines -  Nakasiguro ng tiket sa quarterfinals ang pitong Pinoy boxers sa 2017 Ulaanbaatar Cup Boxing Tournament na ginaganap sa Ulaanbaatar, Mongolia.

Unang umariba si Jeorge Rey Edusma nang payukuin nito si Wang Yang Yang ng China sa pamamagitan ng 5-0 unanimous decision sa first round ng men’s bantamweight division.

Nakuha ni Edusma ang panig ng limang hurado kung saan nagtala ito ng 30-25, 30-25, 30-27, 30-27 at 30-25 desisyon upang makahirit ng tiket sa susunod na yugto.

Sunod na makakasagupa ni Edusma si Ho Nam Jo ng North Korea na nagtala rin ng 5-0 unanimous decision laban kay Munkhsaikhan Oyunbileg ng host Mongolia.

Pasok din sa quarterfinals sina Dannel Maamo, Judelyn Casin at Riza Pasuit nang kapwa ito magrehistro ng unanimous decision wins sa kani-kanilang karibal.

Tinalo ni Maamo si Batna San ng Mongolia sa men’s flyweight habang namayani naman si Casin kay Tandin Lhamo ng Bhutan sa women’s flyweight at nanaig si Pasuit kay Viska Defri Bambuta ng Indonesia sa women’s lightweight.

Haharapin ni Maamo sa quartes si Gandulam Mungun-Erdene ng Mongolia na nakahirit ng opening round bye samantalang makakatipan ni Casin si Altantsetseg Lutsaikhan ng Mongolia na mayroon ding first-round bye at lalarga si Pasuit kontra kay Shinetsetseg Urantsegtseg ng Mongolia na naka-bye rin.

Nabiyayaan din ng bye sina reigning Southeast Asian Games champion Eumir Felix Marcial (men’s middleweight), Incheon Asian Games silver medalist Charly Sua­rez (men’s light welterweight) at Rio Olympics veteran Rogen Ladon (men’s light flyweight).

Makakalaban ni Marcial si Hu Richa Bilige ng China habang maghihintay pa sina Suarez sa mananalo kina Norovbal Otgontumur ng Mongolia at Xiao Qiuguang ng China at Ladon sa magwawagi kina Ladon Kim Jang Sung ng North Korea at Munkh-Erdene Damdindorj ng Mongolia.

Kamakailan lamang, nakapag-uwi ang national boxing team ng isang ginto, isang pilak at isang tansong medalya sa 2017 President’s Cup - Elite International Boxing Championship na ginanap sa Astana, Kazakhstan.