Pinoy squad puntirya ang krusyal na panalo
FIBA men’s 3x3 World Cup
MANILA, Philippines - Puntirya ng Pilipinas na makuha ang panalo sa huling dalawang krusyal na laro upang umabante sa quarterfinals ng prestihiyosong 2017 FIBA Men’s 3X3 World Cup na ginaganap sa Parc des Chantiers de I’lle sa Nantes, France.
Makakatipan ng Pinoy squad ang Slovenia sa alas-7:40 ng gabi (ala-1:40 ngayong umaga sa Maynila) at ang El Salvador sa alas-9 ng gabi (alas-3 ng umaga sa Maynila).
Kasalukuyang nasa ikatlong puwesto ang Pilipinas sa Pool B tangan ang 1-1 rekord habang nasa unahan ang France at Slovenia na parehong may malinis na 2-0 rekord.
Namayani ang Pilipinas sa Romania (21-15) bago yumuko sa France sa iskor na 11-22.
Kailangan ng Pilipinas na manalo sa Slovenia at El Salvador upang makapasok sa knockout stage dahil ang dalawang mangungunang koponan lamang sa bawat grupo ang siyang mabibiyayaan ng tiket sa next round.
Sasandalan ng tropa si Kobe Paras habang makakatuwang nito sina Kiefer Ravena, Jeron Teng at JR Quiñahan.
Mapapalaban ng husto ang Pinoy sa Slovenians na binubuo ng mga manlalarong nasa Top 20 sa world ranking. Ito ay sina Anze Srebovt (12), Gasper Ovnik (14), Simon Finzgar (15) at Adin Kavgic (17).
Una nang umabante sa quarterfinals ang Serbia (4-0) at Russia (3-1) na galing sa Pool A at ang Netherlands (4-0) at Amerika (3-1) na nasa Pool D.
Hindi naman nakapasok sa final round si Paras sa Slam Dunk competition.
Tanging si Paras lamang ang hindi professional player sa mga lumahok sa kumpetisyon.
Nagtala lamang ito ng 50 puntos.
- Latest