Simula na ang aksyon sa Puerto Princesa beach sportsfest
MANILA, Philippines - Siyam na koponan mula sa anim na bansa ang sasabak sa beach water polo event ng 2nd Pilipinas International Beach Sports Festival na lalarga ngayon sa Baywalk Park sa Puerto Princesa City, Palawan.
Pangungunahan ng nagdedepensang Philippine-Turbo, Surehots Sportsville, Philippine-Envirotech at Puerto Princesa, ang mga local squad sa naturang kompetisyon na sinusuportahan ni City Mayor Luis Marcaida III.
lalahok din sa men’s division ang China, Guam, Hong Kong, Uzbekistan at USA sa tatlong araw na kumpetisyon na inorganisa ng Optimum Sports at AirAsia.
“This is a very good opportunity for us to enter in to this partnership because we want to improve the sports tourism of Puerto Princesa City. We’re excited to host this event, and this is just a start,” sabi ni Marcaida.
Nagkaroon ng pagbabago ang hanay ng Philippine-Turbo, ang defending titlist sa pagpasok nina Maui Valdez, Mico Anota, Paolo Serrano at Aljon Salonga--kapwa mga miyembro ng national team.
Inaasahang makakatikim sila ng mabigat na laban mula sa Sureshots, kampeon sa unang Beach Water Polo Championship noong 2015 na ngayon ay kabilang sa line-up sina dating national team players Tani Gomez, Frazer Alamara, Ricardo Dilap-Dilap at Dale Evangalista.
“It’s a reunion of sorts for us, because we were with the national team that won a silver medal during the 2005 Philippine Southeast Asian Games,” ani Evangelista, presidente ng Optimum Sports.
Kabilang din sa roster ng Sureshots ang Malaysian na si Dowson Kee Mando bilang reinforcement habang sa Philippine-Envirotech naman ay sina Abnel Amilajib, Matthew Yu, Mummar Alamara, Adan Gonzales at Mcgyver Reyes at Puerto Princesa national team member Romark Belo.
Sa women’s division, babandera sa kampanya ng Philippine Sirens sina Bea Garrido, Danyca Evangelista at Jobelyn Ocampo, na sumali sa 2015 SEA Games sa Singapore na mapapalaban sa mga magagaling na atleta mula sa Hong Kong at Uzbekistan.
- Latest
