Smashers nagpalakas sa outright semis seat
Napigilan nina Angel Mae Antipuesto at Lari Yongco ng Air Force ang spike ni Jovelyn Prado ng Power Smashers. Kuha ni Joey Mendoza
MANILA, Philippines - Pinabagsak ng Power Smashers ang Philippine Air Force Jet Spikers, 25-23, 16-25, 25-20, 25-23, para mapalakas ang tsansa sa outright semifinals berth sa Premier Volleyball League Reinforced Conference kagabi sa The Arena sa San Juan City.
Matapos itala ang five-set win laban sa Creamline Cool Smashers noong Sabado, muling umariba ang Power Smashers sa likod ni Thai import Kannika Thipachot para pigilan ang makailang ulit na pagtatangka ng Lady Jet Spikers.
Ito ang ikalimang panalo ng Power Smashers para saluhan ang Perlas Spikers sa ikatlong puwesto hawak ang parehong 5-4 marka sa ilalim ng nagdedepensang Pocari Sweat Lady Warriors na may 6-3 rekord.
Sa kabila ng panalo, hindi kuntento si Power Smashers coach Nes Pamilar sa ipinakita ng kanyang bataan.
“I wasn’t satisfied with the way they played. They took it easy. It seemed like they took their opponent lightly so they relaxed. A lot of my instructions weren’t followed,” ani Pamilar.
Naglista si Thipachot ng 23 hits, habang solido ang suporta ni Thai import Hyapha Amporn na may 11 markers.
Nangibabaw si dating Thai national team member Patcharee Saengmuang sa kanyang 21 points para sa Lady Jet Spikers.
Kumana naman si Angel Antipuesto ng 11 hits.
Sa men's division, iginupo ng Instituto Estetico Manila ang Café Lupe, 25-14, 25-17, 25-21, para umangat sa 2-3 kartada.
- Latest
