Star at Meralco pag-aagawan ang top spot sa elims
MANILA, Philippines - Nagsosyo ang Star at Meralco sa liderato mula sa magkatulad nilang 7-2 kartada.
Sinabi ni Hotshots head coach Chito Victolero na napakahalaga para sa kanila ang talunin ang Bolts ni one-time PBA Grand Slam champion mentor Norman Black.
“It will be a crucial game for both of us. Mental toughness will be a key factor in this game,” wika ni Victolero.
Magtutuos ang Star at ang Meralco ngayong alas-7 ng gabi matapos ang pagkikita ng Alaska at talsik nang NLEX sa alas-4:15 ng hapon sa 2017 PBA Commissioner’s Cup sa Smart Araneta Coliseum.
Nakatabla ang Hotshots sa liderato matapos talunin ang TNT Katropang Texters, 107-97, samantalang nabigo naman ang Bolts sa Globalport Batang Pier, 86-94, sa kanilang mga huling laban bago ang pagdaraos ng SEABA Men’s Championship na dinomina ng Gilas Pilipinas.
Ang mananalo sa pagitan ng Star at Meralco ang makakalapit sa isa sa dalawang ‘twice-to-beat’ incentive sa quarterfinal round.
“It’s an important game for both teams because a win will move you one step closer to the twice-to-beat advantage,” sabi ni Black.
Para palakasin ang kanilang kampanya sa quarterfinals ay muling hinugot ng Star si import Ricardo Ratliffe.
Sa kanyang pagbabalik ay humakot si Ratliffe ng 37 points at 22 boards sa panalo ng Hotshots sa Tropang Texters.
Itatapat naman ng Meralco si reinforcement Alex Stepheson, nagtala ng mga averages na 22.3 rebounds, 17.78 points, 1.56 blocks at 1.56 assists sa siyam na laro.
Sa unang laro, umaasa naman si coach Alex Compton na magwawakas ang apat na sunod na kamalasan ng Aces sa kanilang pagtapat sa Road Warriors.
“This is a huge game for us and we are treating it like a must-win,” sabi ni Compton sa Alaska na haharapin ang San Miguel sa Sabado at ang Star sa susunod na Miyerkules.
“We need to get back on track and play excellent for 48 minutes against a Coach Yeng-coached team that has nothing to lose,” dagdag pa nito.
Samantala, kinuha ng Beermen si balik-import Wendell McKiness, naglaro para sa Alaska at Rain or Shine, para palitan si Charles Rhodes.
- Latest