No. 1 seat asam ng BaliPure

Laro Ngayon (The Arena, San Juan City)

1 p.m. – Café Lupe vs IEM (men’s)

4 p.m. – Power Smashers vs Air Force (women’s)

6:30 p.m. – BaliPure vs Creamline (women’s)

MANILA, Philippines - Puntirya ng BaliPure na masungkit ang top seeding sa semifinals sa pakikipagtipan sa Creamline sa Premier Volleyball League Reinforced Conference ngayong ha­pon sa The Arena sa San Juan City.

Galing ang Water Defenders sa five-set win laban sa Perlas Spikers noong Linggo upang masolo ang li­derato tangan ang 6-2 marka papasok sa semis.

Lalabanan ng Water Defenders ang Cool Smashers sa alas-6:30 ng gabi.

Aariba para sa BaliPure sina Grethcel Soltones, Aiko Urdas, Risa Sato at Jerilli Malabanan katuwang sina Thai import Jaroensri Bualee at American middle hitter Jennifer Keddy.

Subalit gigil ang Cool Smashers na makabawi matapos umani ng five-set loss laban sa Power Smashers sa kanilang huling laro.

Nalaglag sa 3-5 ang baraha ng Creamline.

Papalo para sa Cool Smashers sina three-time UAAP MVP Alyssa Valdez katulong sina imports Laura Schaudt at Kutika Kaewpin na parehong humataw ng 16 puntos sa kanilang huling laro.

Samantala, magpapang-abot naman ang Power Smashers at Philippine Air Force sa ikalawang laro sa alas-4 ng hapon.