Soguilon niyanig ni Borres
BORACAY - Hindi kinaya ni multi-titled Kyla Soguilon ang lakas ni Marie Joe Borres nang umagaw ito ng eksena sa 600m Open Water ng 115th Philippine Swimming League (PSL) National Series - 2nd Gov. Miraflores Swim Cup na ginanap sa Malay, Aklan dito.
Ito’y makaraang lunurin ng 12-anyos na si Borres ang 4:26.83 oras ni two-time Palarong Pambansa Most Outstanding Swimmer awardee Soguilon sa kanyang inirehistrong 4:16.40 tiyempo sa girls’ 12-year 400m event para kunin ang ginto.
Naunang nagpasiklab ang pambato ng Aklan Swim team sa Day One matapos walisin ang limang ginto sa kanyang event.
Inangkin ni Ysabelle Labayen (4:23.20) ng Bacolod ang silver at napunta kay Soguilon ang bronze.
Namayagpag sina Kobe Soguilon at Ony Valencia sa men’s 600m event.
Nagrehistro si Soguilon ng anim na minuto at 39.06 segundo sa boys’ 16-over para ungusan sina Recz Edward Agustin (7:58.12) at Ariel Mesa (10:41.44) na nagkasya sa pilak at tansong medalya, ayon sa pagkakasunod.
Nangibabaw naman si Valencia sa boys’ 15-year category matapos magsumite ng 6:35.67 laban kina silver medalist Paul Anzon Milanes (7:19.62) at bronze winner Lance Roldan (7:56.35).
Nakaginto rin sina Micaela Jasmine Mojdeh (girls’ 10-year 200m), Marc Bryan Dula (boys’ 10-year 200m), Azryle Jeca Garcia (girl’ 9-year 20m), Lowestein Julian Lazaro (boys’ 14-year 400m) at Lucio Cuyong II (boys’ 13-year 600m).
Ang iba pang gold medalists sa Open Water ay sina Roselle Palma (girls’ 7-year 200m), Kate Roberto (girls’ 8-year 200m), King Roberto (boys’ 6-under 200m), Aishel Cid Evangelista (boys’ 7-year 200m), Master Charles Janda (boys’ 8-year 200m), Lord Janda (boys’ 9-year 200m), Joanna Amor Cervas (girls’ 11-year 400m), Jennuel Booh De Leon (boys’ 11-year 400m) Jermaine Eulin (boys’ 12-year 400m), Angela Figalan (girls’ 13-year 600m), Riandrea Chico (girls’ 15-year 600m) at Laira Enero (girls’ 16-over 600m).
“We have spotted a lot of talented swimmers here in Aklan and we’re hoping to develop them, give them proper training and exposure to improve their talent. It’s a step-by-step process and hopefully one day, they’ll blossom into full-grown swimmers,” pahayag ni PSL president Susan Papa.
Napasakamay ng Aklan Swimming Team ang overall title matapos umani ng 1,361 puntos.
- Latest