Magic guard at Thunder forward bibisita sa Pilipinas
MANILA, Philippines - Nakatakdang bumisita sa Pilipinas sina Orlando Magic guard Elfrid Payton at dating WNBA player Sue Wicks para dumalo sa Jr. NBA Philippines’ 2017 National Training Camp sa Don Bosco Technical Institute sa Makati City sa Mayo 12 at 13 at sa SM Mall of Asia Music Hall sa Pasay City sa Mayo 14.
Hindi lamang magdaraos ang 23-anyos na si Payton, ang 10th overall pick ng Philadelphia 76ers bago siya dinala sa Orlando,at si Wicks, naglaro para sa New York Liberty noong 1997-2002, ng clinics kundi tatayo ring coach sa taunang Jr. NBA Alumni All-Star Game.
“I’m excited to visit the Philippines for the first time and I can’t wait to get to the court and help them improve their game,” sabi ni Payton sa isang press statement.
Nagtala si Payton ng mga career averages na 10.8 points, 4.2 rebounds, 6.5 assists at 1.1 steals at naglista ng 12.8 points ngayong season para sa Magic na nabigong makapasok sa Playoffs.
Kinuha naman si Wicks bilang sixth overall pick ng Liberty mula sa Rutgers at naglaro sa WNBA All-Stars noong 2000 hanggang mahirang sa Women’s Basketball Hall of Fame noong 2013.
Samantala, sa kanya namang pagdating sa bansa ay kaagad magiging abala si Oklahoma City Thunder big man Enes Kanter.
Nakatakdang ilunsad ni Kanter ang isang charitable foundation na ipinangalan sa kanya sa hangaring tulungan ang mga mahihirap na bata sa bansa.
Nakipagtambal ang 6-foot-11 Turkish center sa Fountain International School, isa sa mga Cambridge certified institutions, para sa pagtatatag ng “Enes Kanter Light Foundation” na nakatuon sa pagbibigay ng tahanan, pagkain at edukasyon sa mga batang mahihirap.
Ang White Cross Orphanage ang unang makakatanggap ng tulong ni Kanter kung saan siya mamamahagi ng mga regalo.
Kinahapunan ay magtutungo si Kanter sa Greenhills West Clubhouse sa San Juan para makipag-usap at makipaglaro ng exhibition game sa mga estudyante ng Fountain International School.
- Latest