Jefferson nagbangis, Aces 4-0 na

CEBU, Philippines - Mirehistro og 41 puntos ug milangkat og 13 ka rebounds ang import sa Alaska Aces nga si Cory Jefferson aron ituboy ang iyang koponan sa ikaupat nilang sunod-sunod nga daog batok sa Rain or Shine Elasto Painters, 105-102, kagabii didto sa Smart Araneta Coliseum.

Si Jefferson wa mapugngi sa depensa dihang siya maoy midala sa opensa sa Alaska nga kasamtangan karon nga nakigsawo sa Meralco Bolts sa liderato sa standing.

Si JV Casio miiskor og 16 puntos, samtang si Sonny Thoss mitampo og 15 puntos alang sa Alaska nga milabaw og nuybe puntos 80-71 paingon sa final period.

Hinuon sa katapusang 12 minutos sa duwa, milusad og init nga rally ang Rain or Shine sa pagpangulo ni import Shawn Taggart ug rookie Mike Tolomia aron inaug ang labaw sa Aces sa uno punto,98-99.

Gikan didto, nahimong sikit ug kulbahinam ang duwa ug nagpuli-puli og himo og puntos ang duha ka koponan. Hinuon misalbar sa Alaska ang mga krusyal nga free-throws ni Casio nga maoy mihatag sa 104-102 nga labaw sa Aces sa katapusang siyete segundos.

Si Taggart mihimo usab og 40 puntos alang sa Rain or Shine nga nakahiagum sa ikaduha nilang sunod-sunod nga pilde sa lima ka duwa. Hinuon nakuwangan siya sa suporta gikan sa mga local dihang si  Jericho Cruz ra ang mihimo og double-digits sa iyang 11 puntos. (BANAT NEWS)