Ang namatay’ng magtutudlo sa Argao diha sa tukma nga lugar
CEBU, Philippines - Ang mga imbestigador sa Argao Police Station mitataw nga kadtong drayber sa motorsiklo nga gikabangga sa gisakyan sa usa ka magtutudlo nga nakakalas sa iyang kinabuhi, maoy mikawat og agianan nga nakaingon sa aksidente.
Nahitabo kini kaniadtong miaging semana.
Si PO3 Bobby Nasis miingon nga base sa imbestigasyon ilang nasayran nga si Eugene Calisan, 26-anyos nga taga Barangay Canbanua, Argao maoy mikawat og agianan nga alang na unta sa pikas “lane” diha nga mi-overtake siya og usa ka tricycle.
Gikabangga ni Calisan ang laing motorsiklo nga gimaneho sa magtutudlo nga si Jaque Jun Jaca, 36, nadestino sa Argao National High School ug nagpaingon na unta nga mopauli sa ilang panimalay sa Barangay Talaga.
Ang duha ka motorista pareho nga nahagba ug nabagnos sa karsada, apan si Jaca maoy nagrabehan sa mga bun-og sa iyang kalawasan.
Matud pa nga ang mga biktima gidala sa Isidro Kintanar Memorial Hospital sa lungsod sa Argao, apan tungod kay grabe ang kahimtang ni Jaca, gidala siya sa usa ka tambalanan dinhi sa dakbayan.
Si Jaca wala na gyud maluwas pa sa grabe niya nga kahimtang. Wala pa masuta kun ang kabanayan ni Jaca mopasaka ba og kaso batok ni Calisan. (BANAT NEWS)
- Latest
