Aduna na'y negosasyon
CEBU, Philippines - Gikompirmar ni Pinoy ring star Manny Pacquiao kagahapon nga duna siya’y gihimo nga negosasyon aron sangkaon si British fighter Amir Khan.
“My team and I are in negotiations with Amir Khan for our next fight. Further announcements coming soon,” sumala pa ni Pacquiao pinaagi sa iyang Twitter.
Ang maong pamahayag ni Pacquiao daw sa naghatag og gamay nga katin-awan sa mitumaw nga kalibog kun kinsa gyud ang iyang kontra ug asa sab nga nasud siya moaway.
Kini gumikan kay sa nahaunang report, gipahibawo ni Top Rank chairman Bob Arum nga si Pacquiao moaway sunod batok ni Jeff Horn didto sa Australia.
Nalubog kini human si Michael Koncz, ang Canadian adviser ni Pacquiao namahayag nga 100 percent siya nga segurado nga ang eight-division world champion adto mopakita’g aksiyon sa United Arab Emirates.Misamot pa kagubot ang lukot human migawas ang report sa usa ka inilang mantalaan didto sa United Kingdom nga si Pacquiao ug Khan nagkasinabot na nga magsangka didto sa England.
Sa iyang bahin, si Arum daw sa nakadawat na sa kamaturoan nga hanap pa’s diyes panas nga adto mahitabo sa Australia ang sunod nga away ni Pacquiao.
Dili hinuon siya motuo sa tanyag nga $38 million (P1.8 billion) ngadto ni Pacquiao aron kini moaway ni Khan didto sa UAE partikular na sa Dubai.
“I’m a practical man. The money in Australia wasn’t anywhere near $38 million. What do I know? We live in an alternative reality world. I don’t know what the story is. If the $38 million is real, it trumps the Australia deal,” pasabot pa ni Arum. “If it’s real, we will assist putting on the event. But I am not holding my breath and I’m not making plane reservations.” (BANAT NEWS)
- Latest
