Away mag-asawa nauwi sa sunog!
MANILA, Philippines - Dahil sa away magasawa, umaabot sa 160 kabahayan ang natupok ng apoy sa sunog sa komunidad sa Brgy. Tisa at Labangon sa lungsod ng Cebu nitong Lunes ng madaling araw.
Sa ulat ng Cebu City Fire Department, dakong alas- 12:28 ng madaling araw nang mangyari ang insidente.
Ayon sa imbestigasyon, nagsimula ang sunog sa isang bahay sa Brgy. Tisa na mabilis na kumalat sa mga katabi nitong kabahayan .
Ang sunog ay umabot sa katabing lugar sa Brgy. Labangon kung saan natupok ng apoy ang kabuuang 160 kabahayan.
Naideklara naman nang fire out bandang alas-2:33 ng madaling araw matapos na rumesponde ang mga bumbero. Sa inisyal na pagtaya nasa P1.5 M naman ang iniwang pinsala sa nasabing sunog.
Lumilitaw naman sa imbestigasyon na isang mag-asawa umano ang nag-away na sa kainitan ng pagbabangayan ay inihagis ng mister ang lampara sa kaniyang misis na nailagan nito pero aksidenteng nadikit sa ‘flammable material’ na siyang pinagmulan ng sunog.
Pinaghahanap naman ang nasabing mister na kinilalang si Andrew Balunan at misis nito upang maisailalim sa imbestigasyon.
- Latest