Taxi kaduha nakabangga, driver giatake
CEBU, Philippines - Nabangga pa gyud sa ikaduhang higayon ang usa ka taxi samtang padulong unta sa Cebu City Traffic Office aron manubag sa una niyang nabanggaan sa dalan Cardinal Rosales St., Cebu Business Park, Cebu City sa niaging gabii.
Giila ang taxi driver nga si Danilo Tejano, 54, taga Mahusay, Subangdaku, Mandaue City.
Nakabangga si Tejano alas 9:15 sa gabii sa usa ka pribadong sakyanan nga gipanag-iya ni Catherine Lim, 33, taga dalan B. Rodriguez.
Si Lim makig-settle unta sa CCTO apan wala niabot si Tejano ug nakadawat na lang og laing alarma sa panagbangga ang traffic investigator nga si PO2 Wilfredo Caperida alas 10:50 sa gabii sa may dalan Biliran, CBP, nga naglambigit gihapon kang Tejano. Nakadumbol si Tejano og usa ka motorsiklo ug laing taxi samtang padulong sa CCTO.
Matud ni Caparida nga kusog ang dagan sa taxi ni Tejano hinungdan nga nadumbolan og una ang usa ka motorsiklo sunod ang laing taxi ug pag-abot sa hump sa dalan Cardinal Rosales atbang sa Marriot Hotel nabalintong kini.
Giingong giatake ang maong taxi driver samtang nagmaneho hinungdan nga gidala dayon sa Cebu City Medical Center samtang adunay minor injury ang driver sa motorsiklo ug wala ra naunsa ang laing taxi driver.
Pasakaan og kasong reckless imprudence resulting to damage of property ang maong taxi driver. Sheilla Mae Cañete (BANAT NEWS)
- Latest
