Petron, Foton rivalry sisiklab sa Game 1 ng PSL Grand Prix Finals

MANILA, Philippines – Sisimulan na ang bak­bakan sa pagitan ng nagdedepensang Foton at Petron sa paglarga ng Game 1 ng  2016  Philippi­ne Superliga (PSL) Grand Prix women’s volleyball finals sa The Arena sa San Juan City.

Magtutuos ang mortal na magkaribal na Tornadoes at Tri-Activ Spikers sa alas-7 ng gabi habang masisilayan naman ang paluan ng F2 Logistics at RC Cola-Army sa alas-5 sa kanilang battle-for-third match.

Mainit ang sagutan ng Foton at Petron partikular na ang imports na sina Tornadoes skipper Lindsay Stalzer at Tri-Activ Spi­kers top gunner Stephanie Niemer.

Nauna nang nag-post si Stalzer sa kanyang Ins­tagram account ng “we will beat you” patungkol sa Petron ngunit agad din itong inalis ng American open hitter matapos makatanggap ng kaliwa’t kanang negatibong reaksiyon.

Hawak ng Foton ang 2-0 bentahe laban sa Pet­ron matapos magwagi ng dalawang beses sa eliminasyon.

“We’d like to maintain just a little bit of groundedness, confident but not cocky. Playing Petron this year is very different than last year. They have a strong team now than last year, so I’m pretty confident that we know how to beat them. We beat them twice already so we’re going to use it to our advantage,” ani Stalzer.

Tila nagpanting ang tenga ni Niemer sa sinabi ni Stalzer.

Naglunsad ng tirada si Niemer kung saan sinabi nitong handa ang Petron na gawin ang lahat upang makaresbak sa Foton.

“From the way I perceive it, Foton right now is extremely confident, slash arrogant, playing us. So I’m hoping it will come and bite them in the butt because I think they are kind of overlooking us right not,” ani Niemer.

Naghahanda ang Tri-Activ Spiker kung paano makakalusot sa solidong net defense ng Tornadoes na pangungunahan nina 6-foot-5 Jaja Santiago at 6-foot-2 Dindin Manabat. Nais din ng Petron na pigilang makaatake sina Stalzer at Ariel Usher.

Nagtala si Niemer ng 38 puntos laban sa Foton sa kanilang unang paghaharap.

At ito ang nais maulit ni Niemer kung saan kinakailangan nito ng sapat na suporta mula kina Se­rena Warner, Aiza Maizo-Pontillas, Frances Molina at defense specialists Jen Reyes at Bang Pineda.