Cavs ibinangon nina James, Love
TORONTO - Nagwakas na ang kamalasan ng Cleveland Cavaliers.
Humataw si LeBron James ng 34 points, habang humakot si Kevin Love ng double-double sa kanyang 28 points at 14 rebounds para igiya ang Cavaliers sa 116-112 panalo laban sa Raptors.
Nagdagdag naman si Kyrie Irving ng 24 points para sa ika-14 tagumpay ng Cleveland sa 19 games at nagkaroon si J.R. Smith ng left knee injury matapos ang kanyang jump shot sa first quarter.
Binanderahan ni DeMar DeRozan ang Toronto sa kanyang 31 points kasunod ang 24 ni Kyle Lowry.
Sa Atlanta, itinala ni Russell Westbrook ang kanyang ikaanim na sunod na triple-double sa tinapos na 32 points, 12 rebounds at 13 assists para pamunuan ang Oklahoma City Thunder sa 102-99 panalo.
Ito rin ang pang-anim na dikit na ratsada ng Thunder para sa kanilang 14-8 baraha.
Mula sa 55-54 abante sa halftime ay pinahigpit ng Oklahoma City ang kanilang depensa para iwanan ang Atlanta sa 83-69 sa third period.
Nakadikit ang Hawks sa 99-102 agwat mula sa lay-up ni Dennis Schroder sa nattirang 34 segundo ng fourth quarter.
- Latest
