Westbrook bumira ng ika-5 triple double
Tinangkang supalpalin ni Solomon Hill ng Pelicans si Russell Westbrook ng Thunder
Thunder sinalanta ang Pelicans
OKLAHOMA CITY--Hindi nagkamali si Michael Jordan sa pagtulong na mailuklok si Russell Westbrook sa Oklahoma Hall of Fame.
Bumida si Westbrook sa 101-92 panalo ng Oklahoma City laban sa New Orleans Pelicans nang kumayod ng 28 points, 17 rebounds at 12 assists.
Hinirang si Westbrook bilang unang player na nagposte ng limang dikit na triple-doubles matapos ang pitong dikit ni Jordan noong 1989.
“I just play, honestly,” sabi ni Westbrook. “I don’t want to get in a conversation of if I’m going to do it every night. I just go out and compete at a high level every night, like I’ve been doing since I’ve been in the NBA.”
Naipanalo ng Thunder ang lima nilang sunod na laro sa likod ng limang triple-double ni Westbrook.
Nagtala si Westbrook ng average na triple-double ngayong season sa kanyang mga averages na 31.0 points, 10.8 rebounds at 11.3 assists sa 21 games.
Ito ang kanyang ika-10 triple-double sa season at pang-47 sa career niya.
Kumolekta naman si Enes Kanter ng 17 points at 10 rebounds kasunod ang 15 markers ni Victor Oladipo para sa Thunder.
Bumandera sa panig ng Pelicans si Anthony Davis, ang NBA leading scorer, sa kanyang 37 points at 15 rebounds.
Binitbit ng Oklahoma City ang 49-41 bentahe sa halftime kung saan kumamada si Westbrook ng 12 points, 9 rebounds at 6 assists.
Ang dunk ni Westbrook sa gitna ng third quarter ang naglayo sa Thunder ng 57-47 patungo sa 78-66 pagbaon sa Pelicans papasok sa fourth quarter.
Sa iba pang resulta, tinalo ng Orlando ang Detroit, 98-92; dinaig ng New York ang Sacramento, 106-98; at pinatumba ng Indiana Pacers ang Los Angeles Clippers, 111-102.
- Latest
