Mbala UAAP MVP

MANILA, Philippines - Pormal nang igagawad bukas kay Cameroonian Ben Mbala ng De La Salle University ang Most Va­luable Player award bago magsimula ang Game 2 ng UAAP Season 79 men’s basketball best-of-three finals sa Smart Araneta Coliseum.

Nakalikom si Mbala ng 92.4286 statistic points (SPs) matapos magtala ng averages na 20.6 points, 16 rebound at 2.14 blocks kada laro sa double-round elimination phase upang masiguro ang MVP award.

Malaking tulong si Mbala upang makuha ng La Salle ang top seed sa eliminasyon tangan ang 13-1 rekord.

Tinulungan din ni Mbala ang La Salle na makapasok sa finals nang gapiin ng Green Archers ang Adamson University sa semis, 69-64.

Sa kasalukuyan, hawak ng La Salle ang 1-0 bentahe laban sa Ateneo de Manila University sa best-of-three chamionship series.

Pangungunahan din ni Mbala ang Mythical Team kasama ang katropa nitong si Jeron Teng na may 57.3333 SPs.

Pasok din sa Mythical sina Raymar Jose ng Far Eastern University (53.6429), Andres Paul Desiderio ng University of the Philippines (55.1429) at Thirdy Ravena ng Ateneo (49.1429).

Nasungkit naman ni Aljun Melecio ng La Salle ang Rookie of the Year plum nang magrehistro ito ng 36.5714 SPs na nabuo mula sa kanyang averages na 8.4 points, 2.4 rebounds at 1.0 assist sa eliminasyon.

Maliban sa individual awards, nakatakda ring gawaran ng pagkilala ng UAAP management committee ang mga natatanging atletang sumabak sa mga international competitions.

Kabilang rito sina Ian La­riba ng table tennis at Jessie Khing Lacuna ng swimming na nagpartisipa sa 2016 Olympic Games sa Rio de Janeiro, Brazil.