‘Langoy Capiz’ lalarga ngayon
Nakipag-kamay si PSL President Susan Papa kay Carmen Andrade, Business and Sports consultant ng Provincial Government ng Capiz nang mag-courtesy call ang PSL sa opisina nito. Nasa larawan din si Maria Susan Benasa, PSL Secretary General (kaliwa), Guia Banton at Jose ‘Pepe’ Borres, presidente ng Capiz Turboshark swim team.
MANILA, Philippines – Magtatagisan ang mga bagitong tankers mula sa iba’t ibang panig ng Visayas region sa paglarga ng 105th Philippine Swimming League (PSL) National Series ngayong umaga sa Villareal Sports Complex sa Roxas City, Capiz.
Mahigit 300 tankers ang nagkumpirma ng partisipasyon sa pangunguna ng host Capiz, Aklan, Bacolod, Cebu City at Iloilo.
Ang torneo ay magsisilbing tryout para sa mga nagnanais maging bahagi ng pambansang delegasyon na ipadadala sa mga international competitions sa Australia, Japan, Singapore at Hong Kong sa susunod na taon.
“This event is open to all young and aspiring swimmers who want to be part of the PSL team competing in different international tournaments. We are looking forward to discover more fresh talents,” wika ni PSL President Susan Papa.
Ilan sa produkto ng Visayas sina PSL reigning female swimmer of the year Kyla Soguilon, Lucio Cuyong at Joemarie Borres na umaani ng gintong medalya sa mga international tournaments na nilalahukan ng PSL.
Naisagawa ang nasabing kompetisyon sa tulong ng Capiz Turboshark sa pangunguna ni Jose “Pepe” Borres at sa pakikipag-partner sa Provincial Government of Capiz sa pangangasiwa ni Governor Antonio del Rosario at Carmen Andrade para i-promote ang sports tourism program ng probinsiya.
Paglalabanan ang gintong medalya sa 6-under, 7-year, 8-year, 9-year, 10-year, 11-year, 12-year, 13-year, 14-year at 15-over sa boys at girls kung saan ang mangungunang mga tankers sa bawat kategorya ay gagawaran ng kani-kanilang Most Outstanding Swimmer awards.
Nagpapasalamat din ang PSL sa suporta ng Island Hotel sa ilalim ng Puerto de Panay Township sa pamamahala ng CEO na si Jose Nery Ong.
- Latest
