Cavs minalas sa Clippers
CLEVELAND-- Tinapos ng Los Angeles Clippers ang kanilang tatlong sunod na kamalasan nang talunin ang Cavaliers, 113-94 dito sa Quicken Loans Arena.
Umiskor si JJ Redick ng 21 points sa first half para tulungan ang Clippers na magtayo ng 58-50 abante laban sa Cavaliers.
Nag-init naman sa third period si Chris Paul matapos kumamada ng 11 points kung saan tinabunan ng Los Angeles ang Cleveland sa pamamagitan ng kanilang 20-point lead.
At nang magposte ang Clippers ng 27-point advantage sa gitna ng fourth quarter ay hindi na nakabangon ang Cavaliers, napuwersa sa kabuuang 17 turnovers.
Pinangunahan ni Redick ang Clippers, tumaas sa 15-5, sa kanyang 23 points, habang naglista si Paul ng 16 markers at 9 assists at kumolekta si Griffin ng 13 points.
Binanderahan naman ni Kyrie Irving ang Cavaliers, may 13-4 baraha, sa kanyang 28 points kasunod ang tig-16 nina LeBron James at Kevin Love.
Sa Memphis, isinalpak ni Marc Gasol ang dalawang game-winning free throws para iligtas ang Grizzlies laban sa Orlando Magic, 95-94.
Bumangon ang Memphis mula sa 13-point deficit, 71-84 sa gitna ng fourth quarter nang magpakawala ng 13-1 atake para makadikit sa 84-85 sa huling 3:29 minuto.
Pinamunuan ni Gasol ang Memphis, may 12-8 marka ngayon, sa kanyang 25 points kasunod ang 19 markers ni Troy Daniels.
- Latest