Seaman bag-ong nauli, wa kapangalag-kalag

CEBU, Philippines - Dili na makapanagkot sa iyang minahal sa kinabuhi ang usa ka seaman nga bag-o lang naabot human siya naligsan og truck sa may N. Bacalso Avenue, Linao, Dakbayan sa Talisay niadtong niaging gabii. Ang biktima mao si Mattew Othelo Omega, 44-anyos, minyo nga taga Lungsod sa Minglanilla.

Ang nakaligis kaniya mao ang Isuzu Elf nga adunay plakang UHX-724 nga gimaneho ni Pat Macasero, 51-anyos, minyo nga taga Tapon, Lungsod sa Dumanjug.

Si PO1 Ruel Detuya sa Talisay City Traffic Division nagkanayon nga gikan sa Siyudad sa Sugbo si Macasero. Pag-abot niya sa nahisgutang lugar, giingong kalit lang nga nilabang ang namatay ug nitamak sa brake si Macasero apan awahi na ang tanan tungod kay naigo na ang biktima.

Nalagpot si Omega ug napantok ang ulo sa karsada ug asoy pa ni Detuya nga natumba ang truck tungod sa paglubag sa manobela sa driver.

Gidala sa Talisay City Hospital ang biktima apan gideklarar kini nga dead-on-arrival sa mga mananambal tungod sa grabeng bun-og nga naangkon.

Asoy ni Detuya nga Oktubre 25 naabot ang biktima isip seaman. Hinuon ang drayber nga si Macasero ang gitanggong sa Talisay City detention cell samtang nagpaabot nga pasakaan og kaso. (/GMR)  (BANAT NEWS)