PDRRMO nihatag og training sa usa ka minahan

CEBU, Philippines - Gipaubos sa Provincial Disaster Risk Reduction and Management Office og basic emergency response training ang mga kawani sa usa ka kompaniya.

Moabot sa 26 ka kawani sa JL Regner (JLR) Concrete and Aggregates ang gipaubos sa basic life support (BLS), basic first aid (BFA), environmental ug medical emergency courses.

Ang maong training lakip sa accident limitation program sa kompaniya.

Ang JLR nga usa ka mining and quarrying company nangayo og giya sa PDRRMO aron malikayan ang aksidente sa lugar.

Ang kompaniya mogamit kini og eksplosibo alang sa pagbungkag og dagkung boulders sa ilang quarry site sa Lungsod sa Minglanilla.

Ang PDRRMO nibukas sa ilang buhatan alang sa mga pribadong kompaniya ug mga organisasyon nga magpaubos og training alang sa pagtubag sa kalamidad.

Si Dennis Chiong, PDRRMO officer, nagkanayon nga usa sa ilang mga programa mao ang paghatag og training sa mga pribadong kompaniya ilabi na niadtong giilang high risk.

Matud niya nga kung dunay madisgrasya sa site sa kompaniya mahatagan na dayon kini og first aid.

Ang mga kawani sa pribadong kompaniya nga napaubos sa training magamit usab silang force multiplier sa probinsiya kung gikinahanglan. (/GMR)  (BANAT NEWS)