EDITORIAL - May laing kalibutan?

Magpanon ug magdasok na usab ang katawhan ngadto sa mga nagkalain-laing mga sam-ang aron managkot og kandila ug molitok og mga pag-ampo alang sa kaluwasan sa mga kalag sa mga minahal nga nitaliwan na sa laing kalibotan.

Naandan na nga ang mga nahibiling buhi karon maoy awhagon sa Simbahan nga i-ampo ang mga kalag sa mga nitaliwan na. Daw kaakohan sa mga buhi ang ilang mga minatay.

Apan walay nangahas pagpangutana kun ngano ug kun unsay rason nga ang mga buhi man maoy mag-ampo alang sa kaluwasan sa mga kalag sa mga nangamatay na.

Ang matag relihiyon adunay kaugalingong pagtan-aw kun unsay sunod sa kamatayon.

Adunay mga sekta nga nagtudlo nga kun mamatay na ang tawo wala nay sunod pang gitawag og ‘kinabuhing dayon.’ Sama lang sa switch sa suga, ini og pawong mopuli na ang way kataposang kangitngit.

Apan wala sila makapresentar og ebidensya nga mangitngit sa pikas kalibotan?  Kun duna man, tinud ba nga gikan sila sa pikas kalibotan?

Sa pikas bahin, ang ubang mga dominanteng relihiyon sama sa Katoliko, Islam, Buddhism ug uban pang denominasyon sa pagtuo, nagtudlo gyud nga adunay gitawag og “kinabuhing dayon” human sa kamatayon.  Apan sila usab way seyintipikong ebidensya nga mapresentar kondili ang gitawag lang nga “hugot nga pagtuo” nga adunay Labaw nga Makagagahum nga mohukom sa mga buhi ug nangamatay na sa oras sa pagpaningil.

Kadtong maayo og binuhatan may paraiso nga nagpaabot kanila, o ba kaha mabuhi pagbalik sa mas harohay nga kinabuhi ug uban pang maayong padulngan sa mga dautan sa impiyerno ang padulgan. Bisan kun way pruweba way mawala sa tawo kun magpakabuhi kini og tarong pinaagi sa paghigugma ngadto sa ginikanan, anak, asawa, bana, pamilya, kahigalaan ug bisan niadtong ubang tawo.

Tungod kay kausa ra moagi sa kalibutan ang tawo ug posibleng wa nay sunod pa. Maayo gihapon kining gitudlo sa mga relihiyon aron adunay lantawon sa unahan nga angay pangandaman.