Reyes bubuo ng solidong lineup para sa Gilas Pilipinas

MANILA, Philippines – Isang solidong lineup ang nais buuin ni Gilas Pilipinas Chot Reyes para sa malalaking international competitions na lalahukan ng koponan sa susunod na taon.

Nangunguna na sa listahan si three-time MVP June Mar Fajardo ka­sama ang Mythical Five members sa katatapos na PBA season.

Maliban kay Fajardo, target ni Reyes sina Jayson Castro, Calvin Abueva at Terrence Romeo gayundin si Arwind Santos na mapasama sa listahan ng 12  PBA players na kukunin.

Ang mga mapipiling PBA players ang makakasama ng 13 manlala­rong napili ng Samahang Basketbol ng Pilipinas mula sa amateur level gaya nina Mac Belo, Arnold Van Opstal, Kevin Ferrer at Ed Daquiaog.

“The Mythical Five are high on our list. But there’s a problem in June Mar Fajardo and Arwind Santos as they are both from San Miguel Beer. We’re allowed to pick only one player per PBA team,” ani Reyes.

Isang matangkad na European player naman ang nais ni Reyes na mapasama sa lineup bilang naturalized player. “An option is a tall European who can shoot from the outside,” aniya.

Nais ni Reyes na simulan agad ang pagsasanay ng Gilas sa unang bahagi ng susunod na taon para paghandaan ang SEABA, FIBA Asia Championship, SEA Games, Jones Cup at ang qualifying tournament para sa 2019 World Cup.

Maliban sa pagiging coach ng Gilas, si Reyes din ang president at chief executive officer ng TV5 subalit hindi aniya magiging balakid ang pagkakaroon ng kabi-kabilang tungkulin dahil sanay na ito sa mga ganitong sitwasyon.