EDITORYAL - Dili lang trabaho sa DOH

Daghang tawo ang mibasol sa gobiyerno tungod niining pagsiaw karon sa sakit nga dengue diin daghan na kaayong mga bata ang namatay, daghan ang naa karon sa tambalanan ug posibleng aduna pay daghang mangamatay sa umaabot nga panahon.

Apan sayop nga basulon ang gobiyerno o ang mga lokal nga kagamhanan tungod kay dili man sila maoy direktang napaakan og lamok, kun dili, ang mga tawo man. Ang katawhan maoy naa sa ubos, ang gobiyerno naa sa ibabaw. Ang angay buhaton, molihok na lang ang mga tawo ug dili na paabuton pa nga molihok ang ilang mga lokal nga opisyal pagkontra sa sakit nga dengue.

Dili husto nga adto lang ang tanan isalig sa kagamhanan kay wala man gihapon kini mahimo kun aduna nay natakboyan sa mga miyembro sa pamilya.

Kaniadto pa, ang kampanya sa mga tinugyanan sa gobiyerno, naglakip sa information drive sa kabarangayan, pagpangandam sa mga medisina o kemikal aron patyon kining mga semilya o gub-on ang mga dapit nga itlogan sa mga lamok.

Ang gobiyerno maoy mangita og mga pamaagi o programa aron batokan kining dengue aron dili mosanay o modaghan pa ang mga matakboyan, apan kutob ra sila pag-organisar tungod sa kagamay lang sa ilang mga sakop.

Ang adunay dakong papel pagpugong niining maong sakit mao ang katawhan mismo kay ang ilang mga anak man maoy direktang maapektohan. Dili gyud hinuon ikalimod nga adunay mga tawo nga walay pagpakabana apan dili man sila maoy importante, kun dili, ang mga miyembro man sa tagsatagsa ka pamilya.

Kinahanglan nga maminaw gyud sa mga pahimangno gikan sa mga adunay kasayuran sama  sa Department of Health o ba kaha sa mga barangay health centers.

Busa, mahinungdanon nga bisan wala molihok ang mga lokal nga mga opisyal kabahin sa problema, ang mga tawo na ang molihok kay para man kini sa ilang kaugalingong kaluwasan ilabi na sa kabataan.