UAAP beach volley: La Salle tinuhog ang FEU
MANILA, Philippines – Naiselyo ng nagdedepensang De La Salle University nina Desiree Cheng at Tin Tiamzon ang 19-21, 21-15, 15-11 come-from-behind win laban kina Bernadeth Pons at Kyla Atienza ng Far Eastern University upang masiguro ang unang panalo kahapon sa UAAP Season 79 women’s beach volleyball competition sa Sands SM By The Bay.
Magugunitang ang FEU rin ang tinalo ng La Salle sa finals noong nakaraang taon nang sina MVP Kim Fajardo at Cyd Demecillo pa ang naglalaro para sa Lady Archers.
Sa taong ito, nasa reserve list si Fajardo.
Nagparamdam din ng lakas sina Cherry Rondina at Jem Gutierrez ng University of Santo Tomas nang mabilis nitong dispatsahin sina Michelle Morente at Kim Gequillana ng Ateneo de Manila University, 21-10, 21-15.
Sa iba pang resulta, namayani sina Diana Carlos at Arielle Estrañero ng University of the Philippines kontra kina Jema Galanza at Bernadette Flora ng Adamson University, 21-18, 21-16, habang nanaig sina Roma Doromal at Aiko Urdas ng National University laban kina Judith Abil at Angelica Dacaymat ng University of the East, 17-21, 21-9, 15-9.
Sa men’s division, ginulantang nina KR Guzman at Anthony Arbasto ng Growling Tigers sina defending champions Marck Espejo at Ish Polvorosa ng Blue Eagles, 21-17, 21-15. Wagi rin sina Jude Garcia at Jeremiah Barrica ng Tamaraws kina Levin Dimayuga at Cris Dumago ng Green Archers, 21-12, 14-21, 16-14.
- Latest
