5th Asian Beach Games: Ochoa ibinigay sa Pinas ang unang ginto
MANILA, Philippines - Nahablot ni jiu-jitsu artist Margarita Ochoa ang unang gintong medalya ng Pilipinas sa 5th Asian Beach Games na ginaganap sa Danang, Vietnam.
Inilampaso ng reigning World Jiu-jitsu Championship gold medalist na si Ochoa si Suwanan Boonsorn ng Thailand sa bendisyon ng 99-4 desisyon upang masungkit ang korona sa women’s -45 kg.
Nauna nang tinalo ni Ochoa sina Dinara Jumadurdyyeva ng Turkmenistan sa semifinals (99-0) at Do Thu Ha ng Vietnam sa quarterfinals (2-1) para maisaayos ang pakikipagtuos kay Boonsorn sa gold medal match.
Nagkasya naman sa pilak na medalya si Gian Taylor Dee sa men’s -62 kg. class matapos matalo kay Amir Yahya Abdulamir Albazy ng Iraq, 2-4 sa championship round.
Bago makapasok sa finals, pinatalsik muna ni Dee sina Sarawut Petsing ng Thailand sa semifinals, Al Hazza Jarrah ng Kuwait sa quarterfinals at Bursulton Bozorov ng Tajikistan sa Round of 16.
Kasalukuyang nasa ikaanim na puwesto ang Pilipinas sa medal standings hawak ang isang ginto, isang pilak at anim na tansong medalya.
Ang tanso ay galing kina Phillip Delarmino (men’s bantamweight 51-54 kg.) Jonathan Polosan (men’s lightweight 60-63 kg.) at Jay Harold Gregorio (men’s middleweight 71-75 kg.) sa muay thai; Jenielou Mosqueda (women’s -75 kg.) at Helen Dawa (women’s -52 kg.) sa kurash; at Apryl Jessica Eppinger (women’s -62 kg.) sa jiu-jitsu.
Nagkasya naman sa ikalimang puwesto si Julian Reem Fuentes sa men’s long jump competition na ginaganap sa Son Thuy Beach kung saan nagtala ito ng 7.21 metro distansiya.
- Latest
