Daquis team captain ng PSL-Manila
MANILA, Philippines - Itinalaga si Rachel Anne Daquis bilang team captain ng Philippine Superliga (PSL)-Manila na sasabak sa FIVB Women’s Club World Championship na gaganapin sa Oktubre 18 hanggang 23 sa Mall of Asia Arena sa Pasay City.
Ayon kay PSL President Tats Suzara, napili si Daquis dahil sa malalim nitong karanasan sa international competitions gayundin ang lideratong maaari nitong maibigay sa koponan kasama ang iba pang local players at foreign reinforcements.
Bukas-palad namang tinanggap ni Daquis ang tungkuling pamunuan ang PSL-Manila.
“I am truly humbled by the trust and support given by the management and my teammates. Rest assured that I would do my best to guide the team and represent the country in this very important tournament,” aniya.
Dumating na sa bansa ang pitong imports na sina Tinchaya Boonlert ng Thailand, Ekaterina Krivets ng Russia, Lynda Morales ng Puerto Rico, Yevgeniya Nyukhalova ng Ukraine, Lindsay Stalzer at Stephanie Niemer ng US, at Yuri Fukuda ng Japan.
Kasama rin sa koponan sina Jovelyn Gonzaga ng RC Cola-Army, Ces Molina at Jen Reyes ng Petron, Jaja Santiago ng Foton at sina Mika Reyes at Kim Fajardo ng F2 Logistics.
Mapapalaban ang PSL-Manila laban sa matitikas na koponan mula sa Turkey, Thailand, Italy, Brazil, Switzerland at Japan.
Kinuha rin ng PSL si Moro Branislav ng Serbia bilang bagong head coach ng PSL-Manila habang magsisilbing assitant coaches naman sina Japanese Shun Takahashi at Sammy Acaylar.
Matagal nang nililigawan ng PSL si Branislav ngunit abala pa ito noon sa kanyang mga coaching duties dahilan upang kunin si Takahashi.
Subalit nagkaroon ng pagkakataon na maisingit ni Branislav ang imbitasyon ng PSL.
- Latest
